Dúas persoas tiveron que ser rescatadas do interior do seu vehículo despois de que este envorcase na estrada que vai de Goián a Vilanova de Cereira, no concello pontevedrés de Tomiño.

Foi un dos familiares dos afectados quen informou ao 112-Galicia do que sucedera ás 08,15 horas da mañá deste xoves. Na chamada alertaba de que o turismo envorcara e que comezaba a entrar auga no interior.

Nada máis recibir a información, os xestores do Centro Integrado de Atención ás Emerxencias (CIAE) 112 Galicia comunicaban o suceso aos servizos sanitarios de urxencia, aos Bombeiros de Baixo Miño e Vigo, aos membros do GES da Guarda e aos axentes de Tráfico. Así mesmo, solicitouse a colaboración dos voluntarios de Protección Civil da localidade.

Unha vez no lugar, os axentes procederon a rescatar as dúas persoas, un home e unha muller que foron valorados polo persoal sanitario no mesmo lugar do accidente.