Un home foi interceptado en Tui por conducir un vehículo que circulaba a unha velocidade moi reducida cun cepo inmovilizador na roda dereita dianteira.

Segundo trasladou nun comunicado a Comandancia da Garda Civil de Pontevedra, os feitos tiveron lugar a semana pasada despois de que os efectivos fosen alertados de que un vehículo circulaba a unha baixa velocidade pola A-55 en dirección Portugal á altura de Tui. Esta situación provocara situacións de risco de colisión por alcance.

Tras o desprazamento á zona do Destacamento de Tráfico de Vilaboa, alcanzouse ao vehículo. Así, os axentes comprobaron que o automóbil, cuxa matrícula era portuguesa, circulaba cun cepo nunha roda dianteira, que se atopaba esnaquizada.

O turismo fora inmobilizado horas antes debido a que o seu condutor dera un resultado positivo nas probas de consumo de sustancias estupefacientes mentres circulaba pola N-550 á altura de Guillarei, en Tui. Por este motivo, o condutor do vehículo foi notificado como presunto autor dun delito contra a seguridade viaria por circular dun modo “neglixente e temerario para os demais usuarios da vía”. Finalmente, as dilixencias instruídas foron trasladadas ao Xulgado de Instrución en funcións de garda de Tui.