Un dos mergulladores dos Grupos Especiais de Actividades Subacuáticas (GEAS) da Garda Civil logrou acceder este luns pola mañá ao ‘narcosubmarino’ afundido este fin de semana na ría de Aldán, en Cangas, de onde extraeu un fardo, e púidose comprobar a existencia de droga no seu interior. Así o confirmou o delegado do Goberno, Javier Losada, quen explicou que, na zona do afundimento, permanecen efectivos de Aduanas e de Garda Civil para tentar reflotar o artefacto.

Así mesmo, explicou que, tras a detención de dous dos tripulantes da embarcación submarina (de nacionalidade ecuatoriana), que previsiblemente pasarán a disposición xudicial “ao longo do día”. Séguese buscando a un terceiro sospeitoso, que se atopa “fuxido“.

Ese operativo, levado a cabo por Garda Civil, Policía Nacional e Vixilancia Aduaneira, desencadeouse tras o afundimento do batiscafo, na madrugada do domingo e, segundo precisou o delegado do Goberno, “aínda non se terminou”. Losada evitou pronunciarse sobre a cantidade de cocaína transportada por esta nave (cuxo punto de partida estaría en Sudamérica), pero fontes da investigación apuntaron que se trata de “unha importante cantidade”.

Mentres, efectivos da Garda Civil tentarán ao longo da xornada deste luns reflotar o ‘narcosubmarino’. Así, no lugar do afundimento desta embarcación, a poucos metros da costa na zona de Punta Couso, na parroquia de Ou Hío, hai despregados efectivos de Garda Civil (a patrulleira ‘Curvo Mariño’ e mergulladores dos GEAS), que son os que coordinarán o operativo para reflotar o batiscafo.