Axentes da Policía Nacional da Comisaría de Vigo detiveron a dous veciños da cidade, de 17 e 21 anos de idade, como presuntos autores dun roubo con violencia, por un atraco a man armada cometido o pasado mes de setembro nunha farmacia da rúa Tomás Alonso.

Segundo informaron fontes policiais, os feitos tiveron lugar á primeira hora da tarde do pasado 23 de setembro, cando dous individuos entraron na farmacia coa cara cuberta por pasamontañas. Un deles portaba unha pistola, mentres que o outro esgrimía un coitelo. Tras ameazar á farmacéutica, obrigárona a darlles o diñeiro da caixa rexistradora, e tamén levaron a recadación dunha hucha dunha organización contra o cancro, antes de fuxir á carreira.

No marco da investigación, a Policía reuniu diferentes probas, algunhas delas obtidas na inspección das rúas próximas á farmacia, e lograron identificar a dous homes, un deles menor de idade, como sospeitosos do roubo.

Finalmente, os dous mozos foron detidos esta mañá, de forma simultánea, en dous puntos diferentes da cidade de Vigo. Unha vez en dependencias policiais, tomóuselles declaración e comprobouse que tiñan antecedentes, algúns por roubo. As dilixencias, levadas a cabo polo grupo de UDEV-II da Brigada de Policía Xudicial, foron postas a disposición do xulgado de instrución de Vigo e da Fiscalía de Menores de Pontevedra.