Un home faleceu a madrugada deste domingo despois de caer desde unha altura mentres pescaba no porto deportivo de Domaio, no municipio pontevedrés de Moaña.

O Centro Integrado de Atención á Emerxencia (Ciae) do 112 Galicia tivo constancia do sucedido ao redor das 02,15 horas deste domingo. O aviso foi dado por unha persoa particular, que chamou aos servizos de emerxencias coa intención de solicitar asistencia sanitaria para atender ao home que caeu.

Segundo o 112 Galicia, o particular que deu a chamada de alerta indicou que un home caeu desde unha altura neste porto deportivo mentres estaba a pescar. De inmediato, os xestores do CIAE puxéronse en contacto cos efectivos sanitarios que tras chegar ao lugar e, a pesar dos esforzos, nada puideron facer por salvarlle a vida, explicou o 112 Galicia.

Ao mesmo tempo, ao lugar dos feitos tamén se trasladaron os Bombeiros do Morrazo e os axentes da Policía Local.