A Garda Civil recuperou nunha empresa en Ponteareas medio milleiro de palés subtraídos que se atopaban depositados na mesma compañía na que xa se interviñeron outros 1.300 o pasado mes de marzo deste ano.

Segundo informou o Instituto Armado, tanto o responsable de compras como a administradora da devandita empresa mercantil foron investigados por un suposto delito continuado de receptación.

As investigacións levadas a cabo por efectivos do Posto Principal da Garda Civil de Ponteareas iniciáronse por mor das sucesivas denuncias que se recibiron polo roubo ou furto de palés, sobre todo desde que se publicou nos medios o resultado da operación que levara á recuperación de 1.300 palés nunha empresa de Ponteareas, que foran subtraídos no polígono industrial Arrufana de Mos, relataron as mesmas fontes.

As pescudas levaron á Garda Civil a realizar unha nova inspección nesta empresa, onde se incautaron 509 palés que figuraban denunciados como subtraídos en distintas empresas da zona sur da provincia, a maior parte delas situadas no polígono industrial da Granxa, no municipio do Porriño.

A localización desta nova partida de palés e as irregularidades que se detectaron nos rexistros contables da empresa, destacou o Instituto Armado, deron lugar a que, por segunda vez, “na escasa marxe de tres meses, se procedese á notificación como investigados, tanto ao responsable de compras como á administradora de dita mercantil, como supostos autores dun delito de receptación”, engadiu.

DEPÓSITO

Os palés recuperados, que mantiñan as súas cores e marcas orixinais, foron retirados polas respectivas empresas propietarias, que se fixeron cargo dos mesmos en calidade de depósito.

As pescudas levaron tamén á detención dun veciño de Vigo, de 23 anos e nacionalidade portuguesa como presunto autor do roubo ou furto da maior parte dos 509 palés recuperados. As dilixencias instruídas entregáronse no xulgado de Instrución de garda de Ponteareas.