Os servizos de emerxencia rescataron este domingo a unha muller que caeu por un desnivel dun tres metros de profundidade cando camiñaba por unha cala de Monte Lourido no concello pontevedrés de Nigrán.
Tal como informou o 112 Galicia, foi necesario o uso dunha padiola especial para o rescate da ferida, que foi evacuada ao Hospital de Povisa de Vigo para ser atendida das lesións provocadas polo golpe.
Os servizos de emerxencia mantiveron comunicación “en todo momento” coa ferida, que indicaba que apenas se podía mover debido a un forte golpe que recibiu na cabeza.
A vítima asegurou, ademais, que se precipitou por un desnivel nunha cala de Monte Lourido, á que chegou despois de percorrer polo menos un quilómetro polo Paseo de praia América.
Os xestores do Centro Integrado de Atención ás Emerxencias pediron a colaboración dos membros do Ges do Val Miñor co fin de traballar xunto aos profesionais sanitarios no rescate e atención da ferida. Tamén participaron no rescate axentes da Policía Local.
