Os servizos de emerxencias desaloxaron na noite deste xoves un edificio de catro plantas situado no municipio de Ponteareas (Pontevedra) por mor dunha fuga de gas, debido ao que dúas persoas foron trasladadas a un centro sanitario vigués por precaución.
Segundo informou o 112 Galicia, o suceso rexistrouse pasadas as 20,00 horas deste xoves nun edificio situado no número 3 da rúa das Lavandeiras. Un veciño alertou de que percibía un cheiro a gas, pero descoñecía a orixe, e indicou que dúas persoas se atopaban con molestias. Por iso, o Centro Integrado de Atención ás Emerxencias (CIAE) pasou aviso ao 061, aos Bombeiros de Vigo e ao GES-SPEIS de Ponteares.
Tamén se puxeron os feitos en coñecemento da Policía Local, dos voluntarios de Protección Civil da localidade e técnicos da empresa subministradora do gas.
Así, tras o desaloxo preventivo das vivendas, os servizos de emerxencias realizaron as comprobacións oportunas para localizar a fuga. As medicións practicadas polos efectivos do Servizo de Prevención, Extinción de Incendios e Salvamento resultaron negativas, o que permitiu que os veciños puidesen regresar ás súas vivendas. Ademais, por precaución, concretaron as mesmas fontes, foron trasladadas dúas persoas con molestias ao Hospital Álvaro Cunqueiro (HAC) de Vigo.
