Unha persoa tivo que ser excarcerada na mañá deste martes en Vigo despois de que o vehículo no que viaxaba saíse da vía e impactase contra a mediana na rúa Arquitecto Antonio Palacios. Segundo informou o 112 Galicia, os feitos ocorreron poucos minutos despois das 12.30 horas. Foron varios os particulares que alertaron do accidente e advertiron de que podía haber persoas atrapadas no interior do vehículo.

Unha vez no lugar, os bombeiros de Vigo confirmaron que había unha persoa dentro do coche que non podía saír polos seus propios medios, polo que iniciaron as correspondentes tarefas de excarceración. No operativo participaron tamén os profesionais de Urxencias Sanitarias de Galicia-061 e axentes da Policía Local de Vigo.