Axentes da Policía Nacional axudaron a salvarlle a vida a un home que sufriu unha parada cardiorrespiratoria nunha rúa do barrio vigués de Bouzas. En concreto, os axentes colaboraron co persoal sanitario nas manobras de reanimación cardiopulmonar (RCP). Así mesmo, garantiron a seguridade do perímetro da intervención, afastando as persoas alí congregadas e acordando a zona para facilitar o labor dos servizos de emerxencias. Os feitos ocorreron ao mediodía do pasado día 9, cando se deu o aviso a través dunha chamada de que un home esborrallara na vía pública.

De inmediato, axentes da Policía Nacional pertencentes ao Grupo de Atención ao Cidadán desprazáronse ao lugar, onde comprobaron que o persoal sanitario estaba a practicar manobras de reanimación cardiopulmonar (RCP) á vítima, segundo subliñou o Corpo nunha nota de prensa. Unha vez asegurado o perímetro, os axentes ofrecéronse para facer relevos nas manobras de reanimación; así, un dos policías comezou a facer a masaxe cardíaca. Mentres continuaban as manobras de reanimación, o persoal sanitario seguiu utilizando o desfibrilador.

Confirmada a recuperación da circulación espontánea e ao comprobar que o home comezaba a respirar, a médica ordenou cesar as manobras de reanimación. Finalmente, o home foi estabilizado e trasladado a un centro hospitalario, onde permanece ingresado e evoluciona favorablemente.