A Garda Civil investiga a unha muller residente en Baiona (Pontevedra) como presunta autora dun delito contra os dereitos dos traballadores, un delito de estafa e outro de ameazas e coaccións. A sospeitosa mantiña empregadas na súa casa a mulleres estranxeiras en situación irregular ás que, segundo a investigación, non pagaba polos seus servizos e intimidaba para evitar que denunciasen.

A investigación iniciouse ao detectarse a presenza desta muller, que conta con antecedentes por estafas e outros delitos, nunha urbanización de alto poder adquisitivo de Baiona. A Garda Civil recibiu informacións que indicaban que a investigada buscaba activamente mulleres de orixe suramericana e en situación de vulnerabilidade económica para realizar labores domésticas. Malia prometerlles contratos de traballo, estes nunca se formalizaban.

Tres das prexudicadas presentaron denuncia no cuartel de Baiona, relatando que a muller as coaccionaba e ameazaba con informar da súa situación ilegal para que fosen expulsadas se non aceptaban as súas condicións. De feito, unha das vítimas recibiu unha chamada intimidatoria dun familiar da investigada mentres se atopaba en dependencias policiais, advertíndolle de que “tiña moito que perder” se denunciaba. Segundo a Garda Civil, a sospeitosa debe ao redor de 5.000 euros ás traballadoras, ás que enganaba simulando transferencias bancarias falsas e alegando erros inexistentes nas súas contas.

DELITO DE ESTAFA

A estes feitos súmase un suposto delito de estafa relacionado cunha vivenda. Unha das mulleres que traballaba para ela precisaba urxentemente un fogar para aloxarse coa súa filla e o seu neto menor. A investigada ofreceulle un inmoble e chegou a cobrarle 780 euros en concepto de fianza. Finalmente, descubriuse que a vivenda prometida era en realidade unha casa en ruínas situada no centro histórico de Baiona. As dilixencias por estes casos foron entregadas no xulgado de garda de Vigo.