Dúas persoas, unha delas un axente da Policía Local, tiveron que ser trasladadas polos servizos sanitarios por inhalación de fume tras orixinarse un incendio nunha cafetaría en Vigo. Segundo informou o 112 Galicia, un particular púxose en contacto coa central de emerxencias sobre as 12.30 horas para alertar de que se estaba producindo un incendio na cociña dunha cafetaría na avenida do Alcalde Gregorio Espino, en Lavadores.
Con estes datos, os operadores do Centro Integrado de Atención ás Emerxencias de Galicia (CIAE) deron aviso aos Bombeiros da cidade, así como á Policía Nacional e á Local. Ademais, tamén se solicitou a intervención do Servizo de Urxencias Sanitarias de Galicia-061, xa que os servizos de emerxencia desprazados comunicaron que podía haber varios afectados o punto. Finalmente, os profesionais sanitarios trasladaron a dúas persoas, unha delas un axente da Policía Local. Por outra banda, os bombeiros detallaron que ardera unha freidora.
