O palangreiro galego ‘Nuevo Salmón’, con base no porto da Guarda, que naufragou nas últimas horas a 150 millas de Azores con 11 tripulantes a bordo, afundiuse debido a unha vía de auga, segundo informaron fontes da Organización de Palangreiros Guardeses (ORPAGU) e da propia armadora, Pesqueira Lelo Mar.

Na pasada noite os mariñeiros detectaron unha vía de auga e, aínda que tentaron porlle solución, ao darse conta de que non se podía facer nada, xa tomaron as medidas para porse a salvo, segundo explicou ORPAGU, que tamén matizou que nin esta tripulación nin este barco viviran anteriormente ningún contratempo deste tipo.

Entre os 11 tripulantes hai tres mariñeiros galegos: os irmáns José Manuel e Antonio R.R. e o fillo dun deles, que son o patrón (que tamén é armador), o motorista e o segundo motorista. Todos eles son da Guarda; mentres que o resto de mariñeiros son de nacionalidade indonesia.

Todos foron rescatados sans e salvos polo mercante MC Standard e, posteriormente, trasladados en helicóptero á illa de San Miguel en Azores. Os tripulantes galegos puideron xa falar coas súas familias e atópanse en bo estado. A armadora iniciou xa os trámites para retornalos a casa.

A embarcación afundiuse a 150 millas ao leste de Azores, nunha área que pertence á zona SAR (‘Search and Rescue’) portuguesa, segundo informou Salvamento Marítimo no seu perfil de ‘X’.

A emerxencia foi coordinada polo Centro de Coordinación de Rescate (RCC) Ponta Delgada. O Centro Nacional de Coordinación de Salvamento (CNCS) recibiu a alerta da radiobaliza e o persoal estivo en contacto constante co centro portugués. O ‘Nuevo Salmón’, construído en 1990, era un barco de palangre de 28 metros de eslora e capacidade para 107 toneladas de carga. No momento no que naufragou atopábase faenando á captura de peixe espada.