A Gardaría Civil de Baiona investiga a un mozo de 23 anos, veciño de Ponteareas, como presunto autor de dous delitos de condución temeraria e lesións ocorridos o pasado 27 de xullo no aparcadoiro do centro comercial Nasas de Nigrán.

Os feitos tiveron lugar sobre as 22:50 horas, cando o vehículo, no que viaxaban o condutor e outras dúas persoas, circulaba polo interior do aparcadoiro en sentido contrario e por unha zona prohibida, co obxectivo de abandonar o recinto pola área de entrada de vehículos.

Un vixilante de seguridade, ao decatarse da maniobra, dirixiuse ao condutor para advirtirlle de que circulaba en dirección contraria. O aparcadoiro, segundo sinalan as autoridades, está claramente sinalizado para indicar o sentido de circulación.

O condutor ignorou as indicacións e continuou na mesma dirección, atropelando ao vixilante, que se atopaba diante do vehículo. O impacto derrubouno no chan, causándolle diversas lesións que requiriron atención médica nun centro hospitalario.

Segundo a investigación, o vehículo non detivo a súa marcha en ningún momento nin mostrou intención de auxiliar á vítima, abandonando a zona tras o atropelo.

As dilixencias foron remitidas ao Xulgado de Garda de Vigo, que instrúe o caso.