Unha muller, R.K.A.Q. de Vigo e 44 anos de idade, foi detida na tarde do pasado luns tras supostamente saltarse unha orde de afastamento da súa nai, que tivo que ser trasladada ao hospital. Os feitos ocorreron minutos antes das 16.00 horas na rúa Serafín Avendaño, onde se estaba producindo unha discusión nun domicilio. Unha vez chegou a Policía Local ao lugar, comprobou que había tres mulleres na vivenda, sufrindo unha delas, de 77 anos de idade, unha insuficiencia respiratoria, polo que foi trasladada ao hospital Álvaro Cunqueiro.
Outra das mulleres resultou ser a agora detida, sendo informados os actuantes que era a filla da anciá trasladada, á cal deran de alta o día anterior tras un ingreso hospitalario. Por iso, a súa filla acudira a visitala. Segundo a Policía Local, desde a mañá do día da data a identificada estaba en estado ebrio, comezando unha discusión, “o que provocou a chamada alertante e posiblemente o novo traslado da anciá”. Mediante cotexo da base de datos policial, os axentes pescudaron constáballe unha orde de afastamento de 100 metros e prohibición de comunicarse coa súa nai, polo que foi detida por quebrantamento de condena.
