A muller cuxas pertenzas apareceron preto das ruínas da antiga fortaleza de Rande, baixo a ponte da AP-9 do mesmo nome, foi localizada, segundo confirmaron fontes policiais. Así, a alerta saltou na tarde do domingo, cando o 112 recibiu un aviso por un posible suicidio no estreito de Rande, baixo a ponte, no municipio de Redondela. Alí, na zona onde se sitúan os restos dunha antiga fortaleza do século XVII, apareceron as pertenzas dunha muller, entre elas unha mochila.
Os servizos de Emerxencias despregaron un dispositivo de procura, no que participaron efectivos por terra, mar e aire, ante a sospeita de que podería arroxarse ao mar. Este luns, as pescudas policiais permitiron localizar á muller, que se atopa ben, aínda que se descoñece o motivo polo que deixou as súas pertenzas baixo a ponte.
