Unha condutora resultou ferida este luns tras envorcar o seu coche na N-552, no municipio de Redondela, ao seu paso pola parroquia de Chapela, segundo confirmou o CIAE 112 Galicia.

O accidente ocorreu sobre as 15,45 horas, á altura do quilómetro 6,5 desta estrada, e foi un particular o que alertou a Emerxencias ao atoparse cun turismo envorcado no carril en dirección a Vigo.

O 112 deu aviso aos bombeiros de Vigo (que foron os que finalmente excarceraron á condutora e única ocupante do coche), bombeiros do Porriño, GES de Mos, Urxencias Sanitarias 061, Policía Local e Protección Civil de Redondela, e Garda Civil de Tráfico. O sinistro provocou algunhas retencións na circulación cara a Vigo.