A Policía Nacional detivo nas últimas horas ao presunto autor do atraco a unha sucursal bancaria ocorrido este pasado martes na parroquia viguesa de Beade. Todo iso despois de que os axentes comezasen a procura do devandito individuo tras supostamente entrar nunha oficina de Caixabank, asperxer con gasolina unha mesa e ameazar aos empregados para levar uns 600 euros.

Os feitos ocorreron cara ao mediodía do pasado martes, sendo perpetrados por unha persoa, supostamente o agora detido, e sen que se producisen feridos. O atracador, un home alto vestido con cazadora escura, entrou na sucursal, situada no número 10 da rúa Coutada, e ameazou con prender lume tras asperxer unha mesa da sucursal. Finalmente, logrou facerse cun botín duns 600 euros.

Posteriormente, deuse á fuga nun vehículo en dirección a Bembrive, iniciándose unha procura que terminou coa detención deste home. Fontes policiais explicaron que a investigación continúa aberta.