Axentes da Policía Local de Vigo auxiliaron a unha veciña da cidade, de 84 anos de idade, que vive soa e que o pasado xoves foi atopada no seu domicilio, paralizada e sen poder moverse, tras sufrir un episodio cerebrovascular. Segundo informaron fontes policiais, na noite do pasado xoves, o 092 recibiu un aviso para acudir a un domicilio da rúa Alexandre Bóveda. Alí, unha veciña explicou aos axentes que escoitaba auga correr no interior dunha vivenda, na que vive unha muller de idade avanzada, e que non respondía as súas chamadas.

Os policías comprobaron tamén que a muller non respondía e accederon ao domicilio. Unha vez no interior, atoparon á anciá tirada en chan da cociña, consciente pero incapaz de articular palabra, e co lado dereito do corpo paralizado. Tras colocar á muller en posición lateral de seguridade, os axentes avisaron aos servizos sanitarios de emerxencia, que trasladaron á muller ao Hospital Álvaro Cunqueiro.