O xulgado de instrución número 2 de Tui (Pontevedra) rexeitou a petición do exmozo de Déborah Fernández Cervera, único investigado pola súa desaparición e morte, de declarar a morte da moza viguesa como “indeterminada” e mantén que se tratou dun homicidio, aínda que o procedemento xa se arquivou o pasado mes de xuño por falta de indicios sólidos contra el.

Así o recolle nun auto do pasado mes de xullo, que avanzou este martes Atlántico Diario e que recolle Europa Press, e confirmouno a familia da moza a través de redes sociais, que cualificou o intento do exmozo, Pablo P.S.L., de “artimaña” para tratar de “limpar a propia imaxe”.

O pasado mes de xuño a xuíza acordou o sobresemento e arquivo provisional do procedemento no que se investigaba a desaparición e morte de Déborah Fernández Cervera, entre abril e maio de 2002, ao non haber indicios suficientes contra o único investigado na causa.

A xuíza expoñía que o acervo probatorio solicitado contra o único investigado “non é suficiente para facer unha imputación verosímil dun feito delituoso concreto”, e “non constan indicios plurais e contundentes” para a devandita imputación.

Na súa resolución apuntaba que “nin os testemuños solicitados, nin a práctica da exhumación do corpo da vítima, nin a inspección dun arcón conxelador propiedade no seu día do investigado”, lanzaron “ningún resultado positivo para a investigación”, como tampouco o fixo a análise do móbil utilizado pola vítima que foi atopado en dependencias policiais –e que apareceu casualmente con motivo dunhas obras, 16 anos despois de ser entregado pola familia e sen tarxeta SIM–.

A iso uniuse o resultado das últimas probas de ADN, que confirmou que os restos de seme achados na vaxina da moza, así como nun pano e un preservativo depositados á beira do seu corpo, e un pelo que foi recollido no levantamento do cadáver, non se corresponden coa mostra recollida a Pablo.

Investigación, arquivo e reapertura

Déborah Fernández-Cervera, de 21 anos de idade, desapareceu tras saír da súa casa de Vigo o 30 de maio de 2002 para facer deporte. O seu cadáver foi localizado dez días despois nunha cuneta do Rosal (Pontevedra), a 40 quilómetros do seu domicilio, espido e rodeado de pistas falsas.

A investigación policial e xudicial foi un cúmulo de “chapuzas” segundo a familia, con decisións “incomprensibles”, como que se tardase anos en investigar o teléfono da moza ou o seu computador, en inspeccionar o coche do seu exmozo, ou que non se indagase por que na listaxe de chamadas do teléfono da moza aparecen case unha trintena de ocos en branco.

A pesar dun contundente informe policial de 2010 (elaborado tras cambios no equipo de investigación), que apuntaba ao exmozo de Déborah pola súa vinculación coa desaparición e morte da moza, ese mesmo ano o xulgado arquivou o procedemento. A investigación foi reaberta a finais de 2019.

En febreiro de 2022, por primeira en case 20 anos, citouse como investigada a unha persoa, o seu exmozo, Pablo P.S.L., que compareceu no xulgado de Tui en marzo e proclamou a súa inocencia.