Efectivos de emerxencias rescataron na tarde deste mércores no Porriño a un operario que caera nun depósito de pinturas tras sufrir un desmaio.

Foi un particular o que avisou ao 112 sobre as 16,00 horas. No seu relato, contou que un traballador dunha nave do Polígono das Gándaras habíase desmayado e, como consecuencia, caera ao interior dun tanque de pinturas.

De inmediato foron mobilizados efectivos sanitarios do 061, así como os Bombeiros do Porriño, a Garda Civil, Policía Local e membros da Agrupación de Voluntarios de Protección Civil.

Unha vez no punto, os Bombeiros puideron rescatar ao home empregando materiais específicos. O persoal sanitario trasladouno despois ao centro de referencia.

OPERARIO FERIDO EN GONDOMAR

Tamén esta tarde, pouco antes das 17,30 horas, un particular comunicaba ao 112 a caída dun traballador dunha nave situada na estrada Gondomar-O Porriño, en Vincios.

Ata o lugar acudiu persoal sanitario do 061, efectivos de Protección Civil de Valmiñor e axentes de Policía Local e Garda Civil, que puideron determinar que o operario caera desde o tellado da nave.