Dúas persoas resultaron feridas este venres ao tentar apagar as chamas rexistradas cando ardía o termo eléctrico da cociña da súa vivenda en Vigo, segundo informou o CIAE 112-Galicia.

O suceso tivo lugar sobre as 4,00 horas da madrugada, cando un particular chamou a Emerxencias para informar de que estaba a arder o termo da súa cociña, na súa vivenda da rúa Eduardo Iglesias. O informante alertaba de que había varias persoas feridas con queimaduras, ao tentar apagar o lume polos seus propios medios.

O 112 informou o servizo de Bombeiros de Vigo, a Urxencias Sanitarias de Galicia-061, a Policía Nacional, Policía Local e Protección Civil. Os Bombeiros informaron de que o lume se iniciou na resistencia do termo eléctrico e que, tras sufocar as chamas, baixara o termo á rúa para refrigerarlo.

Por outra banda, dúas persoas resultaron feridas e desprazáronse a un centro médico polos seus propios medios para ser valorados por parte do persoal sanitario.