A Garda Civil do Porriño detivo a tres persoas, dous homes e unha muller de idades comprendidas entre 27 e 40 anos, como presuntas autoras dun delito contra a saúde pública, tras descubrir unha plantación de marihuana no interior da vivenda alugada por un deles no municipio de Mos.

A investigación iniciouse a raiz dunha chamada anónima, que deu lugar a unha vixilancia nas inmediacións da vivenda e á identificación do arrendatario. Este consentiu voluntariamente a entrada no domicilio e así a Garda Civil confirmou que había unha plantación no seu interior; así mesmo, mantén que as outras dúas persoas investigadas, amigos do primeiro, colaboraban con el nas tarefas de coidado da plantación.

En total, os axentes incautáronse de 184 plantas de marihuana, 10 bolsas de cogollos envasados, cun peso aproximado de 5 kg, e diferentes aparellos eléctricos e electrónicos necesarios para levar a cabo a mesma plantación (lámpadas, medidores de temperatura e humidade, sistema de ventilación, filtros, etc.).

Os detidos foron trasladados a dependencias da Garda Civil no Porriño. Dous deles, un home de 40 anos e unha muller de 27 anos de idade, veciños de Vigo, atópanse en España en situación irregular, polo que se puxo este feito en coñecemento da Policía Nacional.

Todos quedaron en liberdade á espera de ser requiridos polo xulgado de instrución do Porriño.