O corpo sen vida dun home foi achado na mañá deste mércores nas inmediacións do ascensor Halo de Vigo, na rúa Serafín Avendaño, segundo informaron fontes da Policía Nacional. Os feitos ocorreron sobre as 10.00 horas e a Policía abriu unha investigación, aínda que “nada apunta a que haxa indicios de criminalidade”. Así mesmo, descártase que fose un accidente laboral e está prevista a realización da autopsia este xoves. O ascensor Halo, que comunica o complexo Vialia con Serafín Avendaño, cunha estrutura que sobrevoa a autoestrada AP-9, atopábase valado, xa que aínda non se puxo en funcionamento.