Polo menos 6 persoas foron detidas a pasada fin de semana nun operativo conxunto de Garda Civil e Policía Nacional na comarca do Baixo Miño, confirmaron fontes coñecedoras da investigación. Trátase dunha actuación vinculada co cultivo e distribución de marihuana e cocaína, e a investigación continúa aberta, polo que non se descarta que se produzan novos arrestos.
Polo momento foron detidas 6 persoas e realizáronse cinco rexistros en vivendas e tamén nunha nave; e interviñéronse diversas cantidades de cocaína, marihuana e haxix, todo iso nas zonas de Tomiño, Tui, Salceda e outros municipios da comarca. As actuacións están coordinadas polo xulgado de instrución 3 de Tui.
Tres dos detidos neste operativo antidroga pasaron este luns a disposición do xulgado de instrución número 3 de Tui, que ordenou o ingreso en prisión dun deles, comunicada e sen fianza. Con respecto aos outros dous, ordenou a posta en liberdade, coa obrigación de comparecer ante o xulgado cando sexan requiridos. Os tres están investigados por un presunto delito contra a saúde pública.
