Dúas persoas resultaron feridas na tarde deste luns nunha colisión múltiple por alcance rexistrada na localidade pontevedresa de Tui. Segundo a información do CIAE 112-Galicia, o suceso ocorreu sobre as 14.00 horas na estrada que une Tui con Vigo, en Guillarei, onde chocaron tres vehículos e tamén resultaron afectados dous coches que estaban estacionados.

Nada máis recibir o aviso, desde o 112 avisouse ao Servizo de Urxencias Sanitarias de Galicia-061. Do mesmo xeito, foron informados os axentes de Tráfico, da Policía Local, os Bombeiros do Porriño e os efectivos da Agrupación de Voluntarios de Protección Civil da localidade. Dous feridos foron trasladados ao hospital Álvaro Cunqueiro de Vigo.