InicioSucesosO acusado de asasinar á súa veciña en Vigo: "Se houbo...

O acusado de asasinar á súa veciña en Vigo: “Se houbo máis puñaladas, non o negarei, pero eu recordo só unha”

Alega que o ruído que facía a vítima impedíalle descansar pero nega que tivese "ningún sentimento" ou trato con ela

PUBLICADO O

O home acusado de asasinar á súa veciña na rúa Zamora de Vigo, en outubro de 2022, e que é xulgado esta semana por un tribunal de xurado na sección quinta da Audiencia Provincial de Pontevedra, alegou na primeira xornada do xuízo que actuou “fóra de control”, pero admitiu que ese día saíu da súa casa cun coitelo “para matala”.

Así o manifestou Pablo P.V. na súa declaración ante o tribunal, na que explicou que, momentos antes dos feitos, el e a vítima cruzáronse no portal do edificio e que ela o insultou. “Mandoume á merda (…) a partir de aí, eu xa non era eu, estaba fóra de control, perdín os papeis, e todo pasou rapidísimo, foi instantáneo”, alegou.

Segundo o seu relato, tras este encontro, no que non se produciu ningunha discusión, el subiu á súa vivenda e o mesmo fixo a súa veciña. A continuación, o acusado colleu un coitelo de cociña e dirixiuse ao domicilio da vítima, ‘porta con porta’ co seu estudo, e sorprendeuna cando ela estaba coas súas chaves abrindo a porta.

Pablo P.V. recoñeceu que saíu da súa casa armado co coitelo “para matala” e tamén admitiu que lle asestou unha puñalada nun costado, cando a muller se estaba virando. No entanto, afirmou non lembrar volvela a atacar, e explicou que, tras esa única acometida, foise á súa casa a lavarse as mans, xa sen a arma (o mango do coitelo rompeu e a folla quedou cravada no corpo da vítima). “Se houbo máis puñaladas, non o negarei, pero eu recordo só unha“, engadiu.

SEN DISCUSIÓNS PREVIAS

O acusado insistiu en que a muller facía ruídos constantemente e impedíalle descansar, e que non cesou nesas molestias a pesar de que el a avisou por escrito, tanto a ela, como ao presidente da comunidade.

Pablo P.V asegurou ante o tribunal que a relación coa súa veciña era “cero” e nunca tiveran ningún encontrón. De feito, explicou que non tiña “ningún sentimento” cara a ela nin ningún trato. Con todo, explicou que, meses antes, en agosto, axudáraa cun problema na súa ‘chave’ da auga.

Desde ese momento, incidiu, “empezou o pesadelo”. O acusado relatou que, nas semanas seguintes, o problema dos ruídos foi a máis e que parecía que a súa veciña “tiña a Orquestra Panorama” na súa casa, unhas molestias que tamén sufrían outros veciños, asegurou.

NOTAS BAIXO A PORTA

Nesta primeira xornada do xuízo declarou como testemuña a filla da vítima, que explicou que a súa nai chegou a comentarlle que tiña problemas con este veciño.

Segundo relatou, a vítima díxolle que este veciño lle deixaba “notas por baixo da porta” e mesmo golpeaba a porta. Así mesmo, afirmou que, nunha das ocasións en que a súa nai entraba a casa, acompañada polo seu fillo (neto da vítima), atopouse unha nota que rezaba: “De min non vas rir, vas rir da túa nai”.

DELITO E PENAS

A Fiscalía considera ao acusado autor dun delito de asasinato con aleivosía, e pide que sexa condenado a 18 anos de cárcere, ademais de indemnizar á única filla da vítima, aos seus pais e á súa irmá.

ÚLTIMAS

Vigo, epicentro da fabricación das narcolanchas

As Forzas e Corpos de Seguridade do Estado aumentaron nos últimos días a presión policial...

Estudantes de Vigo e Monforte álzanse con tres premios da competición educativa Young Business Talents

Dous equipos de alumnado do IES San Tomé de Freixeiro (Vigo) e un grupo...

A concelleira do PP de Vigo Irene Garrido presenta a súa renuncia para centrarse na súa actividade no Congreso

A concelleira do PP de Vigo Irene Garrido presentou este venres a súa renuncia...

O BNG promete ser “a primeira liña de defensa” de Vigo no Parlamento galego, fronte ao “abandono” da Xunta

O BNG trasladou este venres o seu compromiso de ser "a primeira liña de...