Once persoas necesitaron asistencia sanitaria tras producirse unha colisión múltiple na AG-46, a autovía do Morrazo, ao seu paso por Moaña.
Segundo informou o 112 Galicia, as lesións eran, en xeral, leves, por golpes ou por nerviosismo. Ás 12,40 horas, a central de emerxencias recibiu varias chamadas de particulares que alertaban deste sinistro.
Ademais, tamén recibiu datos a través do sistema E-call dun dos vehículos sinistrados, que a través da comunicación co interior, sóubose que entre os feridos había un menor e unha muller embarazada.
Con estes datos, o 112 puxo en marcha un operativo conformado polos profesionais de Urxencias Sanitarias de Galicia-061 e axentes da Policía Local e da Garda Civil de Tráfico. Tamén foron necesarios os equipos de limpeza e mantemento da Axencia Galega de Infraestruturas.
