Axentes da Policía Nacional da Comisaría de Vigo-Redondela detiveron a un limpador dunha residencia de maiores da cidade olívica como presunto autor do roubo de varias xoias na habitación dunha usuaria do centro.

Segundo informaron fontes policiais, o sospeitoso, que levaba poucos meses traballando no servizo de limpeza da residencia, aproveitou que tiña acceso ás habitacións e, en ausencia dunha das usuarias, substraeu un anel e uns pendentes de ouro, valorados en máis de mil euros.

Posteriormente, facéndose pasar polo seu lexítimo propietario, vendeu as xoias nun establecemento de compravenda de ouro, onde foron recuperadas pola Policía. O home foi detido por un delito de estafa e por un furto de xoias, e foi posto a disposición xudicial.