Axentes da Policía Nacional da Comisaría de Vigo localizaron a un veciño da cidade, de 89 anos de idade, cuxa familia o buscaba desde había días, camiñando desorientado e ferido nas inmediacións do parque do Castro.
Segundo informaron fontes policiais, os feitos ocorreron o pasado 30 de marzo, cando o 091 recibiu unha chamada informando da desaparición dun home de avanzada idade, que faltaba desde facía horas do seu domicilio.
Os axentes entrevistáronse cun familiar, que explicou que o ancián saíra de casa sobre as 10,00 horas para dirixirse a un establecemento próximo pero que, transcorridas varias horas, non regresara. Este familiar trasladou a súa preocupación á Policía, porque o desaparecido padece unha enfermidade neurodexenerativa.
A Policía organizou un dispositivo de procura por toda a cidade e logrou localizar ao home horas despois, cando deambulaba desorientado polas inmediacións do parque do Castro. O ancián presentaba un forte golpe na cabeza, polo que foi auxiliado polos funcionarios, que solicitaron a asistencia do 061 para trasladalo a un centro hospitalario.
