Unha muller foi trasladada ao Hospital Álvaro Cunqueiro tras sufrir unha saída de vía co seu vehículo en Redondela. Segundo informou o 112, foi un particular o que, pasadas as 20 horas deste mércores, alertou ao servizo dunha saída de vía en Camiño da Pica Morena, Cabeiro (Redondela).

Do coche accidentado comezaba a saír fume, e as persoas que se achegaron nun primeiro momento sacaron á única implicada para pola a salvo, aínda que finalmente non se orixinaron chamas.

O 112 solicitou a colaboración de Urxencias Sanitarias de Galicia-061, do GES de Mos, da Policía Local e da Agrupación de Voluntarios de Protección Civil de Redondela. Os membros de Protección Civil apuntaban a potencial gravidade da ferida, que sería trasladada en ambulancia ao Hospital Álvaro Cunqueiro.