Os promotores da Plataforma loxística industrial Salvaterra-As Neves (Plisan) aprobaron este xoves, na comisión de seguimento, a cesión da urbanización da zona loxístico-empresarial ao Concello de Salvaterra do Miño, así como a entrega do aproveitamento urbanístico.

Segundo trasladou a Xunta nun comunicado, con esta aprobación, cúmprese a lexislación urbanística e de ordenación do territorio. Estas normas establecen que os promotores están encargados de entregar ao concello os terreos correspondentes ao viario público, zonas verdes, espazos libres e o resto dos espazos destinados a equipamentos públicos.

Na reunión participou por videoconferencia a conselleira de Medio Ambiente, Territorio e Vivenda, Anxos Vázquez, que acordou a entrega ao Concello das Neves do aproveitamento urbanístico, en base á superficie de terreos da Plisan localizados no seu termo municipal. Esta cesión supón o 29,25 por cento da totalidade da área industrial.

Así mesmo, resaltou que a Xunta, promotora da Plisan xunto á Autoridade Portuaria de Vigo e ao Consorcio Zona Franca de Vigo, prevé un orzamento de 1,64 millóns de euros para esta área empresarial.