A estación intermodal de autobuses de Vigo comezará a funcionar este sábado e suporá reducir os traxectos ata en 15 minutos, melloras nas conexións coa AP-9 e o Aeroporto de Vigo-Peinador e eliminación dalgunhas paradas.

Así o indicou Monbus nun comunicado, no que explicou que as rutas do Eixo Atlántico (XG-817) que finalizan en Vigo reducirán o seu percorrido entre 10 e 15 minutos.

Pola contra, as saídas desde a nova estación axustaranse entre 10 e 15 minutos para seguir mantendo as horas de paso e chegada. Por exemplo, o bus A Coruña-Vigo das 13.00 horas chegaba á cidade olívica ás 15.40 horas e agora o traxecto termina ás 15.25 horas.

Desta forma, nestas liñas elimínase a parada do Areal, salvo en autobús Lugo-Vigo das 5.30 horas; e no Vigo-Lugo das 8.30 horas. Pasa o mesmo a de Travesía de Vigo que só seguirá facéndose nos traxectos Pontevedra-Vigo por estrada.

No resto das concesións que teñen parada na antiga estación (XG-623, XG-621, XG-622, XG-624, XG-625 e XG-626) adecuarán os seus percorridos para chegar á nova estación.