A Xunta informou este venres que a crise xeneralizada no abastecemento de materiais provocará unha demora das obras da Cidade da Xustiza de Vigo “previsiblemente dun par de meses”.

Así o sinalou o Goberno galego, quen explicou que pese ao atraso provocado por unha “continxencia de ámbito internacional” que afecta a subministración de materiais, o Executivo autonómico seguirá traballando na axilización dos labores que non dependen deses abastecementos.

“As obras continuaban con normalidade ata a data coa intención de ter en breve rematada a adaptación do edificio (o antigo Hospital Xeral) ás necesidades do complexo xudicial. Pero a situación de desabastecemento global, tanto na chegada de materiais nos prazos acordados como na reposición de subministracións existentes na medida en que se van consumindo, obriga a atrasar a finalización das obras, que se demorarán previsiblemente un par de meses“, engadiu. A previsión era que a obra estivese acabada este mes.

A nova infraestrutura, que acollerá 38 unidades xudiciais, trátase da obra xudicial máis importante da historia en Galicia na que a Xunta investiu máis de 42 millóns de euros.