Investigadores do grupo CIMA da Universidade de Vigo (UVigo) traballan no deseño dun dispositivo que permitirá predicir crise epilépticas con varios minutos de antelación.

Este aparello rexistrará sinais de electroencefalograma para analizalas con intelixencia artificial e buscará patróns que permitan predicir unha crise epiléptica.

“O obxectivo principal é demostrar que é posible predicir as crises epilépticas en tempo real e en pacientes que realicen unha vida normal, fóra da clínica, e buscar o límite ata o cal a tecnoloxía pode chegar en termos de finalidade e predición”, indicou o investigador do grupo CIMA Carlos Riveiro Cedeira, que está a desenvolver o dispositivo no ámbito do proxecto PredicEPI, financiado pola multinacional Indra e a Fundación Universia.

O mesmo dispositivo podería rexistrar as ondas eléctricas cerebrais co obxectivo de apoiar o seguimento de enfermidades e axustar o tratamento por parte do equipo médico a cargo dos pacientes.

Uns 50 millóns de persoas no mundo e unhas 350.000 en España padecen epilepsia, un trastorno do cerebro causado por un funcionamento anormal esporádico dun grupo de neuronas. Aínda que a maioría das crises epilépticas non ocasionan accidentes graves ás persoas, a posibilidade de detectalas antes de que se produzan contribuiría de forma “significativa” a mellorar a súa calidade de vida, explicaron desde a UVigo.