O Xulgado de Instrución 2 de Cangas do Morrazo decretou prisión provisional comunicada e sen fianza para os dous mozos detidos por dúas supostas agresións sexuais a dous menores nesta localidade.
Fontes do Tribunal Superior de Xustiza de Galicia (TSXG) concretaron que estes dous homes, de 19 e 21 anos, pasaron a disposición xudicial na mañá deste mércores.
Posteriormente, o Xulgado de Instrución número 2 de Cangas decretou a prisión provisional, comunicada e sen fianza dos detidos. En concreto, investígase a cada un deles por dous delitos de agresión sexual.
A pasada semana, dúas mozas de 17 e 14 anos fuxiron do centro de acollida de menores Príncipe Felipe, situado en Pontevedra. Tras aparecer varios días despois, estas dúas menores presentaron senllas denuncias por agresión sexual en Cangas.
Os axentes procederon á detención de dous mozos de 19 e 21 anos en relación a estas denuncias. Finalmente, este mércores, o xulgado de Cangas en funcións de garda decretou o seu ingreso en prisión de forma provisional.
