O pasado 21 de maio a Xunta de Galicia abría o procedemento anual de participación no fondo solidario de libros de texto e axudas para adquirir libros de texto e material escolar.

Este tipo de axudas van destinadas a asignación de libros de texto correspondentes aos cursos de 3º a 6º de Educación Primaria en Galicia e a todos os cursos da ESO así como a axudas económicas para o alumnado galego de primeiro e segundo de primaria.

Os requisitos establecidos pola Xunta na súa resolución do 20 de maio de 2021 en canto aos ingresos económicos para poder optar as axudas en Educación Primaria era de non superar os 6000€ por cada membro da unidade (renda per cápita) para obter unha axuda de 210€ ou non superior a 10.000€ para unha axuda de 140€.

No caso do alumnado da ESO as axudas alcanzaban os 240€ e 160€ respectivamente.

Baremar según os ingresos de 2019

A sorpresa da convocatoria foi que, pese á excepcionalidade da situación xerada pola crise do COVID19 durante 2020, a Xunta mantivo o criterio de baremar según os ingresos do exercicio fiscal dous anos anterior ao curso escolar solicitado. Neste caso serían os ingresos familiares de 2019, anterior ao confinamento e os peches da pandemia durante 2020.

Isto provocou que familias que en 2020 e mesmo 2021 están en situación de desemprego ou con dificultades económicas ou perda de ingresos, non tiveran opción a percibir estas axudas.

O mesmo acontece con familias con nenos e nenas nacidas durante o ano 2020 ou 2021, non computarían como membros da unidade familiar de cara a facer o cálculo da renda per cápita.

Unha situación a todas luces inxusta dado que non se achega á situación real das familias en 2021 en plena crise.