O conselleiro de Sanidade, Julio García Comesaña, recibiu na mañá de sábado no Instituto Feiral de Vigo (Ifevi) a segunda dose da vacina de Pfizer contra a covid-19.

Así o confirmou a Consellería, que a través do seu perfil de Twitter destaca que se está “preto de alcanzar o millón de galegos con pauta completa”. “Seguimos traballando cara á nova normalidade, pero sempre con ‘sentidiño'”, agrega.

García Comesaña, nado en 1968, recibira a primeira inxección o pasado 29 de maio, polo que este sábado, ao cumprirse tres semanas, foi convocado para que lle administrasen a segunda.

Este sábado, o Servizo Galego de Saúde (Sergas) citou para vacinar unhas 41.000 persoas, máis de 11.800 en Vigo.