Os novos contaxios de Covid-19, ás portas do último fin de semana antes do inicio do verán, volveron a situarse por baixo do centenar tras o repunte da xornada anterior e caen a 87 no conxunto de Galicia, mentres que os casos activos descenden a 1.344 tras o lixeiro incremento do día pasado que rompeu a tendencia descendente continua de 25 xornadas. En canto aos pacientes ingresados mantéñense en 61.

Segundo os datos publicados na mañá deste venres pola Consellería de Sanidade con rexistros ata as 18,00 horas deste xoves, continúan 16 pacientes Covid en UCI e 45 noutras unidades de hospitalización. Por áreas sanitarias, a presión hospitalaria descende na de Vigo, aínda que seguen dous pacientes Covid en UCI e descenden a sete os doutras unidades –un menos–. 

MENOS CASOS ACTIVOS

En canto aos casos activos de Covid-19, tras o lixeiro aumento da xornada anterior despois de 25 xornadas consecutivas en descenso, volveron a reducirse e sitúanse en 1.344, once menos, ao haber máis altas (97) que contaxios (87), ao que se suma un falecido. Por áreas sanitarias, as infeccións activas descenden nas de Vigo (-20), que queda con 244 casos activos.

Mentres, os novos contaxios de Covid-19 detectados por calquera tipo de proba en Galicia descenderon por baixo do centenar, a 85 –que supoñen 26 menos–. No conxunto de Galicia foron confirmados 85 positivos por Probas Diagnósticas de Infección Activa (PDIA) nas últimas 24 horas, segundo os datos actualizados por Sanidade, deles só tres, á de Vigo.