O alcalde de Vigo, Abel Caballero, chamou a vacinarse e a manter a distancia social ante o “empeoramento” da situación da pandemia en Vigo, xa que nestes momentos é “a cidade con maior incidencia acumulada a 14 días de Galicia”.

Nunha rolda de prensa este luns, o rexedor incidiu en que os cidadáns teñen que “extremar –o seu– coidado” e “ser capaces de parar a pandemia” na cidade, para o que entende que na actualidade “hai dúas formas”.

“Unha é a vacina”, remarcou, a colación do que recomendou que “todo aquel a o que chamen –para vacinarse–, vaia; que nin sequera pregunte que vacina lle van poñer”, posto que “todas as vacinas son moi boas”.

Neste marco, despois de ser vacinado este domingo, puxo o seu caso como exemplo: “Eu fun, puxéronme a vacina que decidiu a autoridade sanitaria, e punto. Rapidísimo, áxil, moi profesional”, aseverou, concluíndo que “o final da pandemia chámase ‘vacina'”.

Acto seguido, indicou que, en tanto as persoas non sexan chamadas a vacinarse, a outra forma de protexerse fronte ao virus é “a distancia social e ter coidado“. “Non se poden facer festas nin andar sen máscara”, dixo, estendendo a recomendación de usar máscara tamén á hostalaría.

Finalmente, chamou tamén á poboación a acudir se reciben a citación para facer probas PCR e cribados. “Hai que ir tamén, son controis moi interesantes para detectar positivos asintomáticos”, selou.