O delegado do Estado na Zona Franca de Vigo, David Regades, entregou á empresa Trastes as chaves de seis locais propiedade do Consorcio no Polígono da Granxa, no Porriño, para a apertura dunha escola infantil.

A este acto, celebrado na mañá deste luns, tamén asistiron a alcaldesa, Eva García de la Torre; o presidente da Entidade Urbanística de Conservación, Indalecio Cuevas, e o seu xerente, David Sobral; así como responsables da empresa, dirixida por Beatriz Cabaleiro.

En concreto, a nova escola establecerase en seis locais, cunha superficie total de 318 metros cadrados, con 75 de zona exterior. En total, ofreceranse 74 prazas para nenos de 0 a 3 anos, e servizos complementarios a menores de entre 3 e 8 anos.

A duración do contrato será de 15 anos e “de maneira inmediata” levará a cabo a adecuación das instalacións. O obxectivo é “pór en marcha a escola infantil no menor tempo posible”.

Neste contexto, Regades trasladou o seu “total apoio” a este proxecto, que considera “fundamental para que a xente que acode a diario a traballar na Granxa poida conciliar a vida familiar e a laboral”. Á súa vez, a rexedora tamén incidiu en que as institucións públicas deben “favorecer a conciliación”.