A unidade de Oncoloxía Pediátrica do Complexo Hospitalario Universitario de Vigo (Chuvi) diagnosticou 25 novos casos en 2020, o que representa tres casos máis que no ano anterior.
Así o comunicou o Servizo Galego de Saúde (Sergas), que indicou que, con iso, a área sanitaria viguesa atende a un total de 160 menores. A maioría deles xa concluíron o seu tratamento no hospital e atópanse en fase de seguimento.
No entanto, hai 10 pacientes en fase de tratamento quimioterápico activo e o Hospital de Día Pediátrico atende de forma ambulatoria a unha media diaria de 8 pacientes. Ademais, faise seguimento a menores con síndromes xenéticas con predisposición ao cancro para tratar de “realizar un diagnóstico precoz”.
Estes datos foron comunicados polo Sergas coincidindo co Día Internacional do Cancro Infantil, motivo polo que o Chuvi enviou “unha mensaxe de apoio e esperanza a todos os menores que están a loitar contra esta enfermidade e as súas familias”.
Neste sentido, a oncóloga Cristina Lorenzo destacou que “o índice de supervivencia do cancro infantil sitúase aproximadamente nun 80 por cento, con progresivos avances cada ano”.
Ademais, destacou que no último ano os menores “demostraron ser un exemplo a seguir na loita contra o covid-19”, xa que se puido manter a actividade asistencial do hospital “sen documentarse ningunha infección”.
