A declaración como investigados por suposto acoso sexual de varios profesores da Escola de Arte Dramática de Galicia (ESAD), con sede en Vigo, quedou suspendida tras a baixa dunha das avogadas, segundo confirmaron a Europa Press fontes xudiciais.

A toma de declaración destes investigados estaba prevista para este mércores no xulgado de instrución número 4 de Vigo, pero a avogada dunha das partes presentou a súa baixa ao ser contacto estreito dunha persoa positiva por COVID-19. Por iso, o xulgado suspendeu estas declaracións.

Esta investigación xudicial partiu das denuncias de varias alumnas do centro educativo por suposto acoso sexual e, a principios de 2020, alumnos e varios profesores iniciaron un calendario de protestas. Segundo sinalou entón unha das docentes, os supostos abusos non foran “episodios puntuais”, xa que tamén exalumnas confirmaran “comportamentos que exceden meros comentarios” e supuñan “violencia contra as mulleres”.

A Consellería de Educación anunciou que abrira un expediente interno para aclarar os feitos, pero quedou en suspenso cando, tras a presentación das denuncias, iniciáronse dilixencias de investigación penal. No entanto, como medida cautelar, os profesores investigados quedaron apartados da docencia.