A Xunta comunicou que os profesores da Escola Superior de Arte Dramática de Galicia (ESAD) investigados por supostos delitos de acoso sexual “quedaron apartados da docencia como medida cautelar” ante o proceso aberto contra eles.

En declaracións a Europa Press, fontes da Xunta manifestaron que, tras coñecer os feitos denunciados, a Inspección Educativa “actuou con toda determinación e abriu unha investigación interna no centro“. No entanto, “de acordo cos protocolos de actuación nestes casos”, dita investigación quedou en suspenso cando a Fiscalía abriu dilixencias penais, aínda que os profesores investigados “quedaron apartados da docencia como medida cautelar”.

Ante estas circunstancias, a Xunta manifestou o seu respecto á acción da Xustiza e a súa colaboración “en todo o que se precise”. Ademais, reiterou o seu rexeitamento e condena a calquera conduta machista. “Defendemos que a loita contra o acoso debe abordarse dunha forma integral desde todas as perspectivas posibles”, concluíu.