O Xulgado de Instrución número catro de Vigo chamou a declarar en calidade de investigados por supostos delitos de acoso sexual a varios profesores da Escola Superior de Arte Dramática de Galicia (ESAD), con sede na cidade olívica.
A investigación xudicial partiu das denuncias de varias alumnas do centro educativo. A partir destes acontecementos, estudantes e profesoras iniciaron a principios de 2020 un calendario de protestas e paros para denunciar a situación.
OS ABUSOS “NON FORON EPISODIOS PUNTUAIS”
Naquel momento, unha das profesoras que apoiou ás estudantes asegurou que estes supostos abusos “non foron episodios puntuais”, xa que tamén exalumnas confirmaron “comportamentos que exceden meros comentarios” e supoñen “violencia contra as mulleres”.
