Sanidade confirmou que ampliará a máis de 32.000 persoas as citas para a realización de test de antíxenos, no marco do cribado masivo que se está realizando na área sanitaria de Vigo.
Fontes do Sergas sinalaron que se ampliará o número de citas previstas, despois de que xa se incrementase dos 22.000 anunciados inicialmente a 27.000 (para o caso de persoas de Vigo).
Finalmente, serán máis de 32.000 as persoas que serán convocadas para acudir a realizarse as probas ao Instituto Feiral da cidade.
Esta decisión, sinalaron as mesmas fontes, adoptouse tras comprobar a baixa participación no cribado do pasado venres pola tarde ( un 56 %) e tendo en conta que o operativo do recinto feiral de Vigo “está deseñado para asumir a máis poboación”.
Por iso, citarase en total a unhas 27.000 persoas do concello de Vigo, a 2.400 persoas do concello de Salvaterra e a outras 3.000 do municipio de Ponteareas.
