Os contaxios diarios de Covid volveron a repuntar a 1.586 en Galicia, tras estabilizarse nos primeiros días desta semana nuns 1.400, e aumentaron a 1.271 os hospitalizados, deles 178 pacientes en UCI –oito máis que a xornada anterior–, polo que a presión nestas unidades de críticos supera o pico da da primeira onda –o 4 de abril notificouse o máximo ata a data, de 177–.

Así se desprende dos datos publicados na mañá deste mércores pola Consellería de Sanidade con cifras recollidas ata as 18,00 horas deste martes, nas que se constata un aumento da presión asistencial nas sete áreas sanitarias galegas, coa da Coruña e Cee á cabeza, con 305 ingresados con Covid en unidades convencionais –23 máis– e 48 en UCI –un máis–; mentres que na de Vigo hai 23 en UCI –sen cambios– e 178 noutras –19 máis–.

CASOS E FALECIDOS

Os casos activos de Covid-19 en Galicia aumentaron en 812 ata situarse en 21.293; dos que 5.679 corresponden á área sanitaria da Coruña e Cee; 3.680 á de Vigo e 3.309 á de Santiago e Barbanza.

En relación aos contaxios diarios, os detectados con diferentes probas ascenden a 1.586, deles 1.297 confirmados por PCR nas últimas 24 horas. Deste xeito, a cifra de contaxiados aumenta en Galicia a 91.178. Por áreas sanitarias, a da Coruña e Cee alcanza os 20.872 contaxiados e a de Vigo sitúase con 17.500.

POSITIVIDADE

Segundo os últimos datos actualizados, as PCR realizadas en toda a Comunidade galega ascenden a 1.357.642 desde o inicio da pandemia na Comunidade galega. E a taxa de positividade aumentou ao 10,8 por cento, tras descender nas dúas xornadas previas a un 9,7%, polo que se mantén por encima do establecido pola OMS para dar por controlada a pandemia, un 5% do que Galicia non baixa desde o 24 de decembro.