Galicia detectou nas últimas 24 horas 160 casos de coronavirus menos que na xornada anterior aínda que se practicaron a metade de probas PCR respecto ao día previo e case 6.000 menos que hai dous días. Unha situación que se produce cando a taxa de positividade é das máis altas desde que se iniciou a pandemia en Galicia, do 8,4%, case o dobre do recomendado pola OMS.

Así figura no balance de datos da pandemia ofrecidos pola Consellería de Sanidade este domingo, no que se iniciou a campaña de vacinación contra a covid-19. Deste xeito, aumenta a presión hospitalaria con oito ingresados máis que na xornada anterior. Son agora 336 as persoas hospitalizadas con diagnóstico de covid-19 nas sete áreas sanitarias galegas. Deles, 58 atópanse na UCI, tres máis que hai 24 horas.

En Vigo descende o cómputo de hospitalizados pola pandemia ata os 61, tres menos que o sábado. Deles, 11 está na UCI –dous menos–.

BAIXAN OS POSITIVOS DIARIOS E AS PCR

En canto á detección de casos, Galicia sumou 213 novos positivos por coronavirus nun día, o que implica unha importante caída de 160 con respecto ás 24 horas previas. Con todo, hai que ter en conta que as PCR realizadas foron 3.050, a metade do día anterior, polo que a baixada dos contaxios rexistrados sucedeuse en todas as áreas sanitarias.

Aínda así, a área sanitaria de Vigo notificou 38 novos contaxios, unha caída de 56 con respecto ao día anterior.

CASOS ACTIVOS

En canto aos casos activos –persoas que seguen diagnosticadas de covid-19–, Galicia volve presentar unha baixada por segundo día consecutivo. Así, Sanidade contabiliza 5.609 casos activos, 107 menos que o día anterior. En Vigo tamén descenden timidamente os pacientes ata o 1.226 –seis menos–.