O alcalde de Vigo, Abel Caballero, pediu este luns transmitir “mensaxes adecuadas ao que está a suceder” porque, aínda que se escoiten “frases” da evolución do COVID na cidade, o certo é que Vigo “está a dobrar o pulso” á pandemia.
Así o transmitiu o rexedor nunha rolda de prensa na que sinalou que, segundo os últimos datos que coñeceu (do pasado 28 de novembro), a incidencia do coronavirus por cada 100.000 habitantes (acumulada a 14 días) na cidade é de 258,3, case cen puntos menos que fai nove días.
Caballero eloxiou o “comportamento exemplar” dos vigueses e pediu “manter a prudencia, a cautela e respectar as normas”, porque ese “esforzo” dá “resultado”.
Así mesmo, tras constatar que se escoitan “frases” de que a evolución á baixa da pandemia na cidade é lenta, o rexedor puntualizou que o nivel de incidencia “está a caer”. “As mensaxes teñen que ser acaídas ao que está a suceder, e o que sucede en Vigo é unha caída sustantiva e sostida do nivel de incidencia”, recalcou, e insistiu en que a cidade está “a dobrar o pulso á pandemia”.
Finalmente, agradeceu aos vigueses o seu comportamento e, en especial, ao sector da hostalaría, e aproveitou para reiterar as súas críticas á Xunta, que “non compensa o seu esforzo”. “O comportamento da Xunta coa hostalaría da cidade é unha vergoña”, criticou, e insistiu en que o goberno galego “está a recibir 750 millóns de euros do Goberno de España” e dá á hostalaría viguesa “5 euros por establecemento”.