Os contaxios de coronavirus Covid-19 volveron a repuntar en Galicia tras confirmarse 734 por PCR nas últimas 24 horas en Galicia, deles 240 na área de Vigo. Ademais, os casos activos aumentaron noutros 253 ata situarse en 9.895, e increméntanse en todas as áreas salvo nas de Ourense e Santiago.

Así se desprende dos datos actualizados na mañá deste xoves na web da Consellería de Sanidade con cifras actualizadas ata as 18,00 horas deste mércores, nas que se reflicte que, tras a área de Vigo, a da Coruña e Cee é a que rexistra máis casos de Covid confirmados por PCR nas últimas 24 horas, con 117; seguida de Pontevedra, con 95; as de Santiago e Barbanza e Ferrol, con 81 en cada caso; Lugo, con 75; e Ourense, con 45.

Se se teñen en conta as altas rexistradas con respecto ao mércores (498 máis), o incremento de casos activos (253 máis) e as persoas falecidas (nove máis), os contaxios soben nuns 760 en Galicia, deles 734 confirmados por PCR nas últimas 24 horas.

En canto aos casos activos de Covid-19, ascenden en todas as áreas sanitarias salvo nas de Ourense e Santiago. En concreto na primeira baixan a 1.152 –59 menos– e na segunda a 1.338 –12 menos–.  Por contra, soben a 2.388 na de Vigo, o que supón 117 máis; a 1.737 na da Coruña e Cee, 69 máis; 1.137 na de Pontevedra e O Salnés, 40 máis; a 1.094 na de Ferrol –un aumento de 65– e a 1.049 na de Lugo –33 máis–.

As persoas curadas ata a data increméntanse ata as 28.964 na Comunidade galega, o que implica 498 máis de que este mércores. Mentres, as PCR efectuadas aumentaron ata as 722.912, o que supón 9.112 máis que as contabilizadas ata este mércores (713.800).

FALECIDOS

En Galicia morreron ata o momento 960 persoas con Covid-19, dúas delas vinculados a casos en residencias de maiores, en concreto un home de 75 anos falecido no Complexo Hospitalario Universitario de Vigo e unha muller de 93 anos no complexo hospitalario ourensán. Procedían, respectivamente, da residencia de Salvaterra do Miño e da Nosa Señora dos Miragres de Barbadás.